Qaradağ RİH-də yeni yaradılmış şöbəyə təyinatlar olub
Rayon İcra Hakimiyyətinin başçısı Süleyman Mikayılovun müvafiq sərəncamına əsasən aprel döyüşçüsü, qazi Həsrət Almasov Vətən müharibəsi iştirakçıları və şəhid ailələri ilə işin təşkili şöbəsinin müdiri vəzifəsinə, aprel döyüşçüsü, qazi Röyal Əşrəfov Vətən müharibəsi iştirakçıları və şəhid ailələri ilə işin təşkili şöbəsinin böyük məsləhətçisi vəzifəsinə təyin edilib.
H.Almasov 1990-cı il mayın 1-də Yardımlı rayonunda anadan olub. O 2010-cu ildən Müdafiə Nazirliyinin zabiti kimi hərbi xidmətə başlamış, 2010-2015-ci illərdə cəbhənin müxtəlif istiqamətlərində xidmət etmişdir. 2015-ci ildə Müdafiə Nazirliyinin Xüsusi Təyinantlı Qüvvələr Kursunu bitirmişdirş. 2016-cı il tarixində aprel döyüşləri zamanı cəbhənin Tərtər rayonu Qapanlı-Seysulan kəndi istiqamətində əməliyyat zamanı yaralanmışdır. 2017-ci ildə yaralandığına görə Müdafiə Nazirliyindən ehtiyata buraxılmışdır.
Daha sonra Səfərbərlik və Hərbi Xidmətə Çağırış Üzrə Dövlət Xidmətinin Qaradağ rayon idarəsinin Çağırış şöbəsinə mütəxəsis vəzifəsinə təyin olunmuşdur.
Azərbaycan Respublikasının Ərazi Bütövlüyünün Müdafiəsi ilə əlaqədar olaraq əlil olmuşdur, Prezident təqaüdçüsüdür.
“Hərbi Xidmətdə fərqlənməyə görə”, “Vətən naminə”, “Fədai”, “Vətənpərvərlik işinin təşkilinə görə” və “Silahlı Qüvvələrin yüz illiyi” medalları ilə təltif edilib.
Röyal Əşrəfov 2010-cu ildən Müdafiə Nazirliyinin zabiti kimi hərbi xidmətə başlamış, 2010-2017-ci illərdə cəbhənin müxtəlif istiqamətlərində xidmət etmişdir. 2016-cı il tarixində aprel döyüşləri zamanı cəbhənin Ağdərə rayonu Talış kəndi istiqamətində əməliyyat zamanı yaralanmışdır. 2017-ci ildə yaralandığına görə Müdafiə Nazirliyindən ehtiyata buraxılmışdır. Daha sonra BORCH WERF MMC şirkətində işləmişdir.
Azərbaycan Respublikasının Ərazi Bütövlüyünün Müdafiəsi ilə əlaqədar olaraq əlil olmuşdur, Prezident təqaüdçüsüdür.
pia.az