Baş redaktor: Ata Abdullayevə, Hafiz Hacıyevə, Əhəd Abıyevə, Araz Əlizadəyə yer verməyin”
Bu adları heç çəkmək istəməzdim, ancaq məcburam. Ata Abdullayev, Hafiz Hacıyev, Əhəd Abıyev, Araz Əlizadə və bu qəbildən olan başqaları, görəsən, hansı fərdi erudisiya dərinliyinə, hansı ictimai maraq miqyasına, hansı mənəviyyat ölçülərinə, hansı informasiya yükünə, hansı fikir keyfiyyətinə görə bizim mediamız üçün belə önəmlidir?!
Əziz jurnalist dostlar, lütfən, bu adamlardan müsahibə almayın. İmkan varsa. Hə, bunlara görə sizin efirinizi, saytınızı izləyən, dinləyən çox ola bilər, ancaq son nəticədə dinləyən və eşidən az olacaq. Heyfdir, mediamızın olan-qalan ciddiyyətini də itirməyək.
Ölüm yatağında olan mediamızın hələ ki, heç olmasa, nəfəsi gedib-gəlir; çıxmayan cana ümid var. Bu son ümidi də əlimizdən verməyək. Əvvəl də dediyim kimi, sizə, dostyana, həmkar kimi ərkim var. İnciməyin. İşinizə qarışmaq kimi olmasın. Ancaq, mümkünsə, bu adamlara efirinizi, səhifənizi verməyin, heyfdir! Belədə də siz bilən məsləhətdir.
...Keçmiş Sovet ordusunun Uzaq Şərqdəki Hava Hücumundan Müdafiə Qoşunarında - radiotexniki batareyada hərbi xidmət keçmişəm. Bizim vəzifəmiz rəqib dövlətin kəşfiyyat-bombardmançı təyyarələrinn uçuş trayektoriyasını izləmək və koordinatlarını müəyyənləşdirib raket hissələrinə mümkün hədəf olaraq ötürmək idi. Həmin kəşfiyyat-bombardmançılar bizim izləmə sahəmizdən yayınmaq üçün çox zaman havaya cürbəcür lazımsız predmetlər - zir-zibil atırdılar. Bizi bir-iki saniyəlik belə "kor etmək" onların işinə çox yarayrdı...
...Yox, bunu elə-belə, əsgərlik xatirəsi kimi yazdım.
Bu arada... müqayisənin yersiz olduğunu düşünənlər varsa, onlara da bir ritorik sualım olacaq: Bəs kimlərisə efirimizə bizi "kor etmək" üçün atıblarsa?! Hər kəsə uğurlar!
Bahəddin Həziyev
“Bizimyol” qəzetinin baş redaktoru