Bakı Musiqi Akademiyasında caz konserti keçirilib
Mayın 7-də Üzeyir Hacıbəyli adına Bakı Musiqi Akademiyasının opera studiyasında Beynəlxalq Caz Günü çərçivəsində caz konserti keçirilib.
AZƏRTAC-dan bildirilir ki, Bakı Musiqi Akademiyasının, Təhsil və Mədəniyyət nazirliklərinin birgə təşkilatçılığı ilə reallaşan konsert, həmçinin Bakı Musiqi Akademiyasının birinci Beynəlxalq Caz Festivalı və Elmi-Yaradıcılıq Konfransı çərçivəsində təşkil olunub.
Konsertdə Əməkdar artist (piano) İsfar Sarabski, Nicat Aslanov (piano), Nərmin Məmmədli (vokal), Arslan Növrəsli (tar) və İsmayıl Məmmədli (piano) çıxış ediblər.
Konsert cazsevərlər tərəfindən maraqla qarşılanıb.
Qeyd edək ki, festivala gənc ifaçıların müsabiqəsi, konsertləri, ustad dərsləri və konfrans daxildir.
Xatırladaq ki, Beynəlxalq Caz Günü - UNESCO-nun sülhməramlı səfiri, dünya şöhrətli cazmen Herbi Henkokun və təşkilatın sabiq baş direktoru İrina Bokovanın təşəbbüsü ilə yaradılıb və ilk dəfə 2012-ci ildə Parisdə həyata keçirilib.
pia.az