İrəvan Madrid prinsiplərindən imtina edə bilərmi?
Bu sözləri Axar.az-a erməni tərəfinin Madrid prinsiplərindən imtina etməklə bağlı çağırışlarını şərh edən politoloq İlqar Vəlizadə deyib. O bildirib ki, Madrid prinsipləri öz-özlüyündə şərti olaraq, qəbul olunan sənəddir:
“Bu, hansısa yekun, tamamlanmış, formasını almış bir sənəd deyil. Bu prinsipləri tərəflər şərti olaraq qəbul edib. Bütün hallarda bu prinsiplər konkret həll yolu tapmaq üçün tərəflərin vaxtı ilə çalışdığını göstərir. Erməni tərəfinin bu çağırışlarının əsas məqsədi vaxt udmaqdır. Yəni ola bilsin, indiyə qədər gedən prosesdə müəyyən uğurlar olub. Azərbaycan tərəfi yenilənmiş Madrid prinsiplərini qismən qəbul edib və danışıqlar prosesində müəyyən istiqamət kimi bunu seçib. Amma Ermənistan liderlərinin bu çağırışları, ictimai nümayəndələrin açıqlamaları destruktiv xarakter daşıyır.
Çünki Ermənistan özü də vaxtı ilə bu prinsiplərin qəbul olunmasında fəal rol oynayıb. Bu prinsiplərdən imtina edən Ermənistan sabah münaqişənin həllinə doğru addım atılsa, yenə də bundan imtina edə bilər. Əslində, həm Minsk Qrupu həmsədrləri, həm də beynəlxalq ictimaiyyət buna biganə yanaşmamalıdır. Çünki Ermənistan münaqişənin əsas tərəflərindən biri kimi daha məsuliyyətli addımlar atmalıdır. Beynəlxalq ictimaiyyət bunu Ermənistandan tələb etməlidir”.
Politoloq Ermənistanın danışıqlar prosesindən imtina edib-etməyəcəyi ilə bağlı məsələyə də münasibət bildirib:
“Heç nəyi istisna etmək olmaz. Amma əgər Ermənistan danışıqlardan imtina etsə, özünü pis vəziyyətə qoyacaq. Ona görə də inanmıram ki, erməni tərəfi nə vaxtsa, açıq şəkildə danışıqlardan, Madrid prinsiplərindən imtina etsin”.
pia.az