“Soyuq əllər, isti ürək” xeyriyyə yarmarkasından Video
Şəhərin ən qaynar nöqtəsi olan bu məkanda günün istənilən saatında insan sıxlığı ilə qarşılaşmaq mümkündür. Burada maraqlı, gözəl suvenirlər, kitablar, yeni il aksesuarları ilə yanaşı dadlı təamlar, fast-food yeməklər də əldə etmək mümkündür. Yarmarkanın üstünlüyü isə ondadır ki, buradan əldə olunan vəsait xeyriyyə məqsədilə istifadə olunur.
Dekabrın 1-də “Nargis” Fondunun rəhbərliyi ilə təşkil olunan “Soyuq əllər, isti ürək” xeyriyyə yarmarkası yanvarın 15-dək davam edəcək. Yeni ilə sayılı günlər qaldığı bir vaxtda musavat.com-un müxbiri yarmarkadakı son durumu, insanların münasibətini, qiymətlər və xidmətin keyfiyyətini öyrənmək üçün sözügedən məkana baş çəkib.
Qeyd edək ki, hər il yeni il ərəfəsində paytaxtın mərkəzi küçəsi öz libasını dəyişərək əyləncə və istirahət məkanına çevrilir. Təmtəraqla bəzədilmiş bu məkana gələnlər özlərini bir anlıq Avropanın mərkəzində hiss edirlər. Fəvvarələr meydanında təşkil olunan xeyriyyə yarmarkasından əldə olunan bütün gəlirlərin müxtəlif xəstəliklərdən əziyyət çəkən körpələrin müalicəsinə sərf olunması da xeyirsevər insanların ürəyincədir.
“Soyuq əllər, isti ürək” xeyriyyə yarmarkasının builki konsepsiyası öncəkilərdən tamamilə fərqlənir. Yarmarkanın bəzədilməsi Skandinaviya stilində və müasir ruhda həyata keçirilib. Yarmarka iştirakçılarına Yeni il dekoru, müxtəlif hədiyyə növləri, geyimlər, əl işi olan zinət əşyaları, oyuncaqlar, qidalar təklif edən 47 ticarət köşkü fəaliyyət göstərir.
Bu yarmarkadan əldə edilən gəlir müalicəyə və əməliyyata ehtiyacı olan uşaqlara sərf edilir. Söhbət Fəvvarələr meydanında təşkil edilən "Soyuq əllər, İsti ürək" xeyriyyə yarmarkasından gedir. Artıq 4-cü dəfə təşkil edilən yarmarkada müxtəlif şirkət və firmalar öz məhsullarını alıcılara təklif edirlər.
Yarmarkaya maraq yüksək səviyyədədir. Əsasən də fast-food və qida məhsulları satılan piştaxtaların önündə növbə gözləyən onlarla alıcıya rast gəlmək mümkündür. Lakin qiymətlərin müəyyən qədər baha olması alıcılığa təsir göstərir. Paytaxt sakinləri əsasən qutab, “peraşki”, çay və şirniyyatların baha olmasından narazıdırlar. Məsələn, hər yerdı 40-50 qəpiyə satılan qutab yarmarkada 2 dəfə baha təklif olunur. Bunu bir çox alıcılar anlayışla qəbul etməsə də, adətən xeyriyyə məqsədli yarmarkalarda insanlar könüllü olaraq məhsulları baha almaqla daha çox fayda vermiş olurlar. Bunun əksinə, yarmakadakı kafedə qiymətlər daha münasibdir, hətta ətrafdakı restoran və kafelərdən daha münasibdir.
Daha ətraflı yarmakadan hazırladığımız videoreportajdan izləyə bilərsiniz.(musavat.com)
pia.az