Umayra Tağıyeva: İqlim antropogen təzyiqlər nəticəsində kəskinləşir
Bunu Ekologiya və Təbii Sərvətlər Nazirliyində keçirilən mətbuat konfransında ekoloji maarifləndirmə və ictimaiyyətlə əlaqələr şöbəsinin müdiri Umayra Tağıyeva deyib.
Onun sözlərinə görə, bütün dünyada hava-iqlim proseslərinin həm insanların gündəlik həyatına, həm də dayanıqlı inkişafa təsiri ilə bağlı narahatlıq artır:
“Buna görə adekvat sosial və iqtisadi qərarların qəbul olunması üçün bu sahədə məlumatlılığın artması vacibdir. Xüsusən, təhlükəsiz və dayanıqlı dəniz və hava nəqliyyatında, effektiv enerji istehsalında, kənd təsərrüfatı və su ehtiyatlarının idarə olunmasında, fövqəladə hallarda tədbirlərin planlaşdırılmasında hava ilə bağlı məlumatlar və xəbərdarlıqlarəsas təşkil edir.
Təbii fəlakətlərin, demək olar ki, əksəriyyəti hidroloji və meteoroloji hadisələr nəticəsində yaranır. Ətraf mühitə antropogen təzyiqlərin artması ilə kəskinləşən iqlim dəyişmələri fonunda yeni hava-iqlim və hidroloji problemlər yaranır.
##relatedPost2##
Atmosfer sirkulyasiyasında dəyişiklik baş verir, bloklaşdırıcı proseslər artır. Təhlükəli hidrometeoroloji hadisələrin həm sayı, həm də intensivliyi çoxalır”.
Umayra Tağıyeva bildirib ki, ETSN-nin hidrometeorologiya xidməti, hava üzərində fasiləsiz müşahidələr aparır, proqnozlar və gözlənilən təhlükəli hidrometeoroloji hadisələr haqqında xəbərdarlıqlar təqdim edir:
“Bəllidir ki, hər hansı bir təhlükəli hidrometeoroloji hadisənin qarşısını almaq mümkün deyil, bütün ölkələr, onların inkişaf səviyyəsindən asılı olmayaraq, təbii fəlakətlər qarşısında həssasdırlar. Fəsadları azaltmaq üçün inkişaf etmiş ölkələrdə müvafiq adaptasiya (uyğunlaşma) tədbirləri həyata keçirilir və bu, öz bəhrəsini verir.
Bu baxımdan, hidrometeorologiya xidmətlərinin əsas vəzifəsi qabaqcadan xəbərdarlıqların verilməsi ilə təhlükəli hidrometeoloji hadisələr nəticəsində baş verə biləcək itkilərin minimuma endirilməsidir. Əsasən o sahələrdə ki, onların fəaliyyəti sırf hava şəraiti ilə bağlıdır”.
Nazirlik rəsmisi qeyd edib ki, gündəlik hava proqnozları ilə yanaşı, təsdiq olunmuş plan-sxem əsasında sinoptiklər tərəfindən xəbərdarlıqlar Bakı şəhəri üzrə 58 müvafiq təşkilata göndərilir:
##relatedPostMilli##
“Eyni zamanda, altı regional hidrometeorologiya mərkəzi tərəfindən xəbərdarlıqlar yerli icra strukturlarına və rayonlarda müvafiq təşkilatlara ötürülür.
Bununla yanaşı, nazirliyin saytında yerləşdirilir, televiziya və radiolara, saytlara təqdim olunur. Xəbərdarlıqlar telefonoqram, faks və internet vasitəsi ilə ötürülür. Məqsədimiz təqdim olunan proqnoz və xəbərdarlıqların dəqiqliyinin artırılması ilə yanaşı, əhatə dairəsini genişləndirmək və daha cəlbedici formada əhaliyə çatdırmaqdır”.
pia.az