Sərnişin Novosibirsk-Bakı təyyarəsini partlatmaqla hədələdi
Təyyarəyə sərxoş vəziyyətdə minən Krasnoyarsk diyarından olan 51 yaşlı sərnişin hava gəmisini partladacağı ilə hədələyib.
"Komsomolskaya Pravda" yazır ki, bu barədə Rusiya Daxili İşlər Nazirliyinin Sibir Federal Dairəsi üzrə Nəqliyyat İdarəsinin mətbuat xidmətinin məlumatında bildirilir.
Məlumata görə, kişi Bakıya birbaşa aviareyslə uçmaq üçün Krasnoyarskdan Novosibirskə gəlib. O, "S7" aviaşirkətinə məxsus təyyarəyə uçmağa hazırlaşan zaman stüardessadan onu ekonom sinifli oturacaqdan biznes sinifli hissəyə keçirməyi tələb edib. Sərnişin rədd cavabı aldıqda isə qışqıraraq deyib: "Məndə bomba var! Sizin hamınızı partladacağam!".
##relatedPost2##
Bu zaman heyət komandiri dərhal uçuşu təxirə salıb və polis çağırıb. Sərnişinlər təxliyyə olunub. Hava gəmisində xidməti itin köməkliyi ilə axtarış aparılıb. Lakin heç bir partlayıcı maddə aşkar olunmayıb. Sonda təyyarə iki saat gecikmə ilə Bakıya yola salınıb.
Sözügedən sərnişin saxlanılıb. Ona qarşı cinayət işi açılıb. İndi sərnişini 5 ilədək həbs cəzası gözləyir.
pia.az