Aİ uzunmüddətli enerji şokuna hazırlaşır

Avropa İttifaqı Yaxın Şərqdə müharibə fonunda mümkün “uzunmüddətli” enerji böhranına qarşı hazırlıqlarını gücləndirir.

Poliqon xəbər verir ki, bu barədə Financial Times nəşrinə açıqlamasında Aİ-nin enerji üzrə komissarı Dan Yorgensen bildirib.

Onun sözlərinə görə, Aİ hazırda bütün mümkün variantları nəzərdən keçirir. Bu variantlara yanacaq normativlərinin tətbiqi və strateji ehtiyatlardan əlavə neft buraxılması kimi tədbirlər də daxildir.

“Bu, uzunmüddətli böhran olacaq. Enerji daşıyıcılarının qiymətləri çox uzun müddət yüksək səviyyədə qalacaq”, – deyə Yorgensen vurğulayıb.

Avrokomissar əlavə edib ki, bəzi “kritik əhəmiyyətli” məhsullar üzrə vəziyyət yaxın həftələrdə daha da pisləşə bilər.

Onun sözlərinə görə, Aİ hazırda “ən pis ssenarilərə” hazırlaşır. Bununla belə, blok hələlik aviasiya yanacağı və dizel kimi əsas məhsullar üzrə normativlərin tətbiqi mərhələsinə çatmayıb.

Analitiklər hesab edirlər ki, Aİ-nin bu cür hazırlıqları enerji bazarındakı qeyri-müəyyənliyin davam etdiyini və regiondakı geosiyasi gərginliyin Avropa iqtisadiyyatına ciddi təsir göstərməkdə davam etdiyini nümayiş etdirir.

Poliqon.info