ABŞ Səudiyyə Ərəbistanı ilə hərbi əməkdaşlıq sazişini müzakirə edir

Poliqon xəbər verir ki, bu barədə Amerika rəsmiləri arasında olan mənbələrə istinadən The New York Times qəzeti məlumat yayıb.

Nəşrin mənbələrinin sözlərinə görə, Vaşinqton və Ər-Riyadın müzakirə etdiyi saziş ABŞ-ın Yaponiya və Cənubi Koreya ilə bağladığı müdafiə sazişlərinə bənzəyəcək. Sənəddə göstərilir ki, Birləşmiş Ştatlar krallığa və ya digər Yaxın Şərq dövlətinə hücum ediləcəyi təqdirdə Səudiyyə Ərəbistanına hərbi dəstək göstərməyi öhdəsinə götürür.

“Vəliəhd şahzadə Məhəmməd bin Salman Birləşmiş Ştatlarla müdafiə sazişini ABŞ prezidenti Co Bayden administrasiyası ilə Səudiyyə-İsrail münasibətlərinin normallaşdırılmasına dair danışıqlarının vacib aspekti hesab edir”, deyə NYT yazır. Qəzet qeyd edir ki, Səudiyyə rəsmiləri müdafiə sahəsində əməkdaşlığın İran və ya onun müttəfiqlərinin potensial hücumlarının qarşısını almağa kömək edəcəyinə inanırlar.

NYT yazır ki, bununla belə, Amerika Konqresi ABŞ və Səudiyyə Ərəbistanı arasında hərbi əməkdaşlıq sazişinə qarşı çıxa bilər. Bəzi ABŞ qanunvericiləri, xüsusən də Demokratlar Səudiyyə hökumətini və şahzadə Məhəmməd bin Salmanı “ABŞ-ın maraqlarına və insan haqlarına az əhəmiyyət verən etibarsız tərəfdaş” kimi qiymətləndirirlər.

Poliqon.info