ABŞ-nin müdafiə naziri: İrana ən böyük zərbə endiriləcək...

Poliqon xəbər verir ki, ABŞ-nin müdafiə naziri Pit Hegset İran əleyhinə həyata keçirilən hərbi əməliyyatların növbəti mərhələsi ilə bağlı sərt bəyanatla çıxış edib. Onun sözlərinə görə, bu gün İran ərazisinə qarşı əməliyyatın başlanmasından bəri ən genişmiqyaslı zərbə endiriləcək, sabah isə bundan da daha güclü hücum həyata keçiriləcək.

Nazir vurğulayıb ki, Vaşinqtonun məqsədi Tehrana açıq mesaj göndərməkdir. Hegset bildirib ki, qarşıdakı günlər İran üçün həlledici olacaq və rəsmi Tehran yaranmış vəziyyətdə düzgün seçim etməlidir.

“Bu gün İran üzrə əməliyyat çərçivəsində indiyədək ən böyük zərbə həyata keçiriləcək. Sabah isə bu hücumdan daha genişmiqyaslı zərbə gözlənilir. Bundan sonra İranın qarşısında seçim olacaq. Ağılla seçim edin. Çünki bu prezident zarafat etmir”, – deyə o qeyd edib.

Ekspertlər hesab edir ki, bu cür açıqlamalar ABŞ-nin regionda hərbi təzyiq strategiyasını daha da sərtləşdirdiyini göstərir. Xüsusilə Yaxın Şərqdə gərginliyin artdığı bir vaxtda belə bəyanatlar genişmiqyaslı eskalasiyanın siqnalı kimi qiymətləndirilir.

Qeyd olunur ki, son həftələr ərzində ABŞ və İran arasında qarşılıqlı zərbələr intensivləşib, tərəflər həm hərbi, həm də siyasi ritorikanı sərtləşdirib. Bu isə regionda təhlükəsizlik vəziyyətinin daha da qeyri-müəyyən hala gəlməsinə səbəb olur.

Analitiklərin fikrincə, əgər tərəflər arasında diplomatik kanallar aktivləşdirilməzsə, qarşıdakı günlərdə daha genişmiqyaslı hərbi toqquşmaların baş verməsi ehtimalı yüksəkdir.

Poliqon.info