ABŞ İranla nüvə sazişinin bərpasını müzakirə etmir…

Poliqon.info xarici mətbuata əsasən xəbər verir ki, Dövlət Departamenti İranla nüvə sazişinə qayıdılmayacağına işarə edib.

Qeyd edək ki, İran Xarici İşlər Nazirliyinin sözçüsü Nasser Kanaani martın 6-da deyib ki, İran 2015-ci ildə imzalanmış nüvə sazişini diriltməyə sadiqdir.

Onun sözlərinə görə, MAQATE-nin baş katibi Rafael Qrossinin Tehrana son səfəri də bu siyasətin tərkib hissəsidir.

Nüvə sazişi İran və 5+1 ölkələr qrupu (BMT Təhlükəsizlik Şurasının beş daimi üzvü - Rusiya, Çin, Fransa, Böyük Britaniya və ABŞ + Almaniya) tərəfindən 2015-ci ildə bağlanıb. Razılaşma Tehranın nüvə proqramının məhdudlaşdırılması müqabilində ona qarşı sanksiyaların ləğvini nəzərdə tuturdu.

2018-ci ildə ABŞ prezidenti Donald Tramp birtərəfli qaydada Vaşinqtonu sazişdən çıxarıb və İrana qarşı yeni sanksiyalar tətbiq edib. Bundan sonra İran sövdələşmə üzrə öhdəliklərinin icrasını tədricən ləğv etməyə başlayıb.

2021-ci ildə Avropa İttifaqının (Aİ) vasitəçiliyi ilə Vyanada nüvə sazişinin yenilənməsi üçün danışıqlara başlanılıb. 2022-ci ildə danışıqlar dayandırılıb.

Poliqon.info